Eru brátt að leggja í hann

Blaðamannafundur var haldinn í Nauthólsvíkinni í morgun til að kynna Ermarsundið og má þegar sjá afraksturinn á mbl.is

Benedikt Hjartarson og boðsundsveit landsliðs Íslands í sjósundi eru að leggja lokahönd á undirbúninginn fyrir hið metnaðarfulla íþróttaafrek að synda yfir Ermarsund og vinna þar með afrek sem Íslendingar hafa ekki gert áður.

Sundmennirnir fljúga til Englands í tveimur hollum rétt fyrir og um helgina en þeir eiga keppnisrétt dagana 10. júlí til 18. júlí. Strax og aðstæður leyfa mun Benedikt Hjartarson synda einn yfir Ermarsundið með aðstoð fylgdarbáts og synda þá frá Dover í Englandi og setja stefnuna á Calais á strönd Frakklands. Daginn eftir að hann lýkur sundi mun boðsundsveitin leggja í hann, synda yfir og aftur til baka. Hver sundmaður syndir klukkustund í senn.

Ef veður og sjólag leyfir og allt gengur að óskum ætti Benedikt að fara á stað 13. eða 14. júlí og sundið að taka 13-15 klukkustundir. Benedikt þarf að synda yfir, komast á þurrt og snúa svo við og synda út í fylgdarbátinn.

Landsliðið í sjósundi færi af stað 15. eða 16. júlí og sundið fram og til baka, England – Frakkland – England, tæki um 22 - 25 klukkustundir.