1 km „Sundlaug”

Nú hefur þetta frábæra starfsfólk í Nauthólsvík sett niður fyrir okkur sjósundfólkið tvær baujur sem eru 500 metra frá veðurbaujunni í sína hvora áttina. Þar með erum við komin með mælda leið til að synda og ekkert að vanbunaði að taka tímann og keppa. Annars synnti ég í tæpan klukkutíma í gær og skrapp svo á sundæfingu í Kópavogi.
Bennih

Samstarfssamningur

Föstudaginn 6. júní undirrituðu Heimir og Benedikt, fyrir hönd Sjósundlandsliðs Íslands, samstarfsamning við Lyfju. Báðir aðilar hugsa sér gott til þessa samstarfs og vona að hann geti orðið til farsældar.

Samstarf hefur tekist við Landsbankann en ekki hefur verið gengið frá undirritun samstarfssamnings vegna anna.

Sex tíma sjósundsmartröð lokið

Til að mega synda Ermasundið verða menn að klára sex tíma prufusund í 16°C köldu vatni eða kaldara. Seinasta ár synti ég frá Nauthólsvík til Hafnafjarðar. Sjórinn er kaldari nú en hann var þá og það má ekki synda í öðru en sundskílunni, með eina sundhettu og eitt par að gleraugum. Til að fylla út í þessa skildu var ákveðið að synda í lóninu í Nauthól. Virtist vera ágætis hugmynd sem reyndist svo vera kvalafull lífsreynsla og mikil andleg þjálfun en takmörkuð sundþjálfun.
Tíu mínútur í níu var allt klárt og þá var byrjað í 11°c köldum sjó. Það var virkilega gott hitastig. Fyrsti hálftíminn gekk vel en eftir það hófst erfiðið. Þá voru pottarnir orðnir fullir og yfirfallið af þeim byrjað að renna út í Nauthól. Það skal tekið fram að þeir voru settir í gang fyrr en venjulega fyrir mig til að hita aðeins lónið. Það er svo yndislega gott starfsfólkið þarna niðurfrá og alltaf til í að hjálpa. Þá gerist það að sjórinn verður í taumum heitur og kaldur. Þeir sem synda í sjónum vita að þegar farið er út í sjó verður manni kalt sem venst svo aftur þegar skrokkurinn dofnar. Við svona tauma dofnar ekkert og alltaf er eins og verið sé að fara út í. Eftir 40 mín var líðanin verulega slæm og sú hugsun ein að hætta. Eftir einn og hálfan tíma kom Stefán Karl út í og það var virkilega gaman að sjá hann og það hélt manni lengur út í en þá var kuldinn orðin það mikill að ég gat varla talað skalf svo mikið. Mikið var gott á að fá félagskap. Eftir fjórar klukkustundir var sjórinn orðin heitur 16.3 °C en samt miklir kuldataumar.

Heimir bættist við og synti nokkrum sinnum með. Góðir félagar. Nú var farið að fjara og eins og að synda í 25 metra barnalaug. Hitinn að aukast og taumarnir að minnka. Síðustu tveir tímarnit voru eins og sundlaugardútl.
Fyrstu 3 tímana fékk ég næringu á klukkutíma fresti en svo á hálftíma eftir það. Um það sá að mestu Starfsmaður Ylstrandarinnar Anna Gunndís (Dunda) og kann ég henni bestu þakkir fyrir. Hún mætti einnig klukkustund fyrir vinnutíma sinn til að gera allt klárt fyrir mig. Hún hitamældi sjóinn á klukkutíma fresti. Heimir og konan mín sáu einnig um að fæða mig.
Eftir sex tíma í lóninu fór ég í sjóinn til að synda almennilega og var það frábært. Jafn hiti, rigning og smá öldugangur.

Mig langar að þakka öllum sem aðstoðuðu mig við þetta. Stefáni Karli, Heimi, konunni og þessu frábæra starfsfólki Ylstrandarinnar sem er alltaf til í að aðstoða og gera það sem er í þeirra valdi til að gera manni dvölina þarna niður frá sem skemmtilegasta.
Bennih

Æfingar

Ég hirði ekki um að telja upp styttri sundin sem ég syndi í miðri viku bæði í sundlaugum og í sjónum. En laugardaginn 24. maí sinnti ég í 5 tíma í Kópavogslauginni og gekk það ljómandi. Ég byrjaði á Rússa með 10 sek. 5,150 km og synti svo 500 og 500 til skiptis bringu og skrið. Án þess að stoppa. Þegar svona langt er synt gleymist (ruglast) að telja vegalengdina og því veit ég ekki hver hún var.
Laugardaginn 31. maí reyndi ég að endurtaka leikinn og synda 5 klukkutíma. Eftir svefnlausa viku, það er verið er að brjóta allan kjallarann hjá mér og ég vinn á næturnar, sef á daginn, þar sem ég hef æft vel þrátt fyrir svefnleysi þá var ég einfaldlega búinn á laugardaginn og gafst upp eftir 3 tíma. Eftir tveggja tíma svefn var haldið í Nauthólsv. og við Birna tókum einn bátahring á góðri ferð.
Sunnudaginn 1. júni, sjómannadaginn, skelltum við Ásgeir járnkarl (hennar Bibbu járnfrúar) okkur í brjáluðum öldugangi inn í botn að bensínstöðinni og yfir í Kópavoginn og svo í x inn á ylströndina um 3 km leið. Það er vart hægt að hugsa sé betri sundfélaga en Ásgeir hann er alltaf svo jákvæður og gefur manni ekki færi á neikvæðni eða svartsýni og rekur mann áfram. Þegar synt er langt hættir manni til að gleyma sér og fer að hugsa eitthvað allt annað en því sem skiptir máli þá hægir maður á sér. En ekki með Ásgeiri
Bennih

Yndislegur dagur

Hófst með því að prufukeyra nýju aðstöðuna í Kópavogi (sundlaugina). Búningsklefarnir mjög góðir. Ekki eins og er í tísku núna svo litlir skápar að ekki er hægt að koma fötunum fyrir. Frábærar setlaugar og leiktæki. Reyndar hélt ég að sundlaugin yrði fullorðins en í staðinn er þetta ein barnalaugin enn. 25 m.
Ég synti Rússabana í gömlu lauginni upp á 5,150 bætti svo tveimur kílómetrum við með blandi af 500m bringu og 500m af skriði til skiptis. Prófaði svo innilaugina og synti nokkur hundruð þar.
Við Heimir skelltum okkur svo í sjóinn seinnipartinn og syntum í kringum bátana í Nauthól.

Fyrsta langsundið í sjónum

Þó æfingar hafi staðið í allan vetur bæði í sundlaugum, sjónum, fimleikasalnum og á grindinni hér heima þá er fyrst núna sem alvöruæfingar hefjast. Fyrsta langsundinu í sjónum lokið. Synti frá rampnum í Nauthólsvík og að bensínstöðinni í Fossvogi. Vegalengdin er 1.2 km aðra leið þannig að syndið var 2,4 km. Brjálaður öldugangur og mikill barningur að komast inn að bensínstöð enda tók það 38 mínútur og töluverður sjór skall á andlitinu og upp í mig. Ég hlakkaði alla leiðina inn eftir til að fara til baka og hafa öldurnar í rassinn. Það var skrítið og öldurnar hentu löppunum oft upp í loftið og stungu mér á kaf með andlitið. Nú man ég hvað var svo gaman við að synda í sjónum. Hitastigið frá 8-9 °C. Eftir volkið í sjónum skellti ég mér í sundlaugina og synti rólega 1 km. þá eru bara eftir teyja á öxlunum en það verður gert í kvöld.